ඔස්ට්‍රේලියාවේ ප්‍රකට මෙන්ම කෝටිපති ව්‍යාපාරිකයකු වන ජේම්ස් පැකර් සුප්‍රකට ක්‍රවුන් සමාගමේ අධ්‍යක්ෂ ධුරයෙන් ඉල්ලා අස්වී තිබෙනවා. ඔහුගේ මෙම තීරණයත් සමග ක්‍රවුන් සමාගමේ පහත බැස තිබු කොටස්වල මිළ ද සීග්‍රයෙන් ඉහළගොස් ඇති බවයි විදෙස් පුවත් සේවාවල දැක්වෙන්නේ.
අදාළ සමාගමේ සභාපති ධුරයට පත්වී මාස 4 කට පසුව ඔහු මෙම තීරණය ගැනීම විශේෂත්වයක්. ආසියානු කලාපීය රටවල් රැසක කැසිනෝ ව්‍යාපාර හිමි ක්‍රවුන් සමාගමේ ආදායම පසුගිය මාස කිහිපය තුල පහත බැස තිබුනා.
ශ්‍රී ලංකා‍වේ කැසිනෝ ව්‍යාපාරයක් ආරම්භ කරන බවට ද ජේම්ස් පැකර් මීට පෙර ප්‍රකාශකර තිබුනා. ඒ හේතුවෙන් ලංකාව තුල නිර්මාණය වුයේ දැඩි මතබේදාත්මක තත්වයක්.
නිවේදනයක් නිකුත් කරමින් ජේම්ස් පැකර් අද සිය ඉල්ලා අස්වීමේ තීරණය ප්‍රසිද්ධියට පත්කර තිබෙනවා. ඔහු ක්‍රවුන් සමාගමේ ඩොලර් බිලියන 9 ක වටිනාකමින් සියයට 53 කට හිමිකම් කියනවා.
කෝටිපති ව්‍යාපාරිකයා සිය තීරණයට හේතුවක් මෙතෙක් නිශ්චිතව හෙළිකර නැහැ. කෙසේවෙතත් සිඩ්නි / මෙල්බර්න් සහ ලාස් වේගාස් නගරවල සංවර්ධන ව්‍යාපෘති රැසකට සිය ශක්තිය යෙදවීමට අපේක්ෂා කරන බව ජේම්ස් පැකර් ප්‍රකාශකර තිබෙනවා.
Post a Comment