බරපතල වංචා විමර්ශන ඒකකයට
ශ්‍රී ලංකන් ගුවන් සමාගමේ සිදුවූයේ යැයි කියන වංචා දූෂණ සම්බන්ධයෙන් කොමිසමෙන් සිදුකරන විමර්ශනයට අදාළව හිටපු පාර්ලිමේන්තු මන්ත්‍රිනී උපේක්ෂා ස්වර්ණමාලි සහ ප්‍රවීන ගායන සහ රංගන ශිල්පියෙකු වන බන්දුල විජේවීරද අද බරපතල වංචා දූෂණ විමර්ශන කොමිසම හමුවට කැඳවා තිබෙනවා.
පසුගිය ජනාධිපතිවරණ සමයේ හිටපු ජනාධිපති මහින්ද රාජපක්ෂ වෙනුවෙන් මැතිවරණ ප්‍රචාරක කටයුතුවලට අදාළව ශ්‍රී ලංකන් ගුවන් සමාගමෙන් මුදල් ලබාගත් බවට ලැබී ඇති පැමිණිල්ලක් සම්බන්ධයෙනුයි මොවුන් දෙදෙනා අද කැඳවා ඇත්තේ.
එමෙන්ම ශ්‍රී ලංකන් ගුවන් සමාගමේ සිදුවූ බව කියන මූල්‍ය අක්‍රමිකතාවක් සම්බන්ධයෙන් බරපතල වංචා සහ දූෂණ විමර්ශනය කිරීමේ ජනාධිපති කොමිෂන් සභාව සිදුකරන පරීක්ෂණවලට අදාළව රාජ්‍ය අමාත්‍ය පියංකර ජයරත්නද ඊයේ ප්‍රකාශයක් ලබාදුන්නා. අවස්ථා තුනකදී ශ්‍රී ලංකන් ගුවන් සමාගමේ ආහාර සැපයුම් අංශයේ සිදුවූ බව කියන මෙම මූල්‍ය අක්‍රමිකතාව රුපියල් මිලියන 500 කට අධිකයි.
ශ්‍රී ලංකන් ගුවන් සමාගමේ හිටපු සභාපති, හිටපු ජනාධිපති මහින්ද රාජපක්ෂගේ බිරිඳ වන ශිරන්ති වික්‍රමසිංහ රාජපක්ෂගේ සොහොයුරෙකු වූ නිශාන්ත වික්‍රමසිංහද හෙට කොමිසම හමුවට කැඳවීමට තීරණය කර තිබුණා. ඒ අනුව ඊට අදාළ නොතීසිය ලබාදීමට කොමිසමේ නිලධාරීන් ඊයේ ගල්කිස්සේ පිහිටි ඔහුගේ නිවසට ගියත් හිටපු සභාපතිවරයාගේ බිරිඳ නොතීසිය ලබාගැනීම ප්‍රතික්ෂේප කර තිබෙනවා. ඒ, වසර ගණනකින් තම සැමියා වූ නිශාන්ත වික්‍රමසිංහ ගල්කිස්සේ නිවසට නොපැමිණි බව සඳහන් කරමින්.
source - gossip.hirufm.lk
Post a Comment