වෛද්‍ය සිසුවා
එලෙස කිරීමට හේතු පවසයි
අධ්‍යාපන කටයුතුවලට අවශ්‍ය මුදල් නොමැතිවීම හේතුවෙන් තමන් බැංකු කොල්ලය සිදුකළ බව පානදුර ප්‍රදේශයේ පෞද්ගලික බැංකුවකින් ලක්ෂ 5 ක මුදලක් කොල්ලකෑම සම්බන්ධයෙන් අත්අඩංගුවට ගත් තරුණයා අනාවරණ කර තිබෙනවා.
පෙරේදා (28) අත්අඩංගුවට ගත් මෙම තරුණයා පොලිසිය සිදුකළ වැඩිපුර ප්‍රශ්න කිරීම්වලදී පවසා ඇත්තේ මීට පෙර අවස්ථා කිහිපයකදීම බැංකු කොල්ලයක් සිදුකිරීමට උත්සාහ කළ නමුත් එය අසාර්ථක වූ බවයි.
පෙරේදා පස්වරුවේ පානදුර ප්‍රදේශයේ පිහිටි පෞද්ගලික බැංකුවක් වෙත පැමිණි මෙම තරුණයා එහි මුදල් කවුන්ටරය වෙත ගොස් සේවයේ නිරතව සිටි නිලධාරිනියට අනතුරු අඟවා තිබුණේ ලක්ෂ 5 ක මුදලක් තමන්ට ලබානොදුනහොත් වෙඩි තබන බවටයි.
එමෙන්ම, මුදල් ලබා ගැනීමට බවට හඟවා ඔහු ඇයට ලබාදුන් මුදල් ලදුපතේ ද වෙඩි තබන බව සටහන් කර තිබෙනවා. ඉන් අනතුරුව රුපියල් ලක්ෂ 5 ක මුදලක් අදාළ නිලධාරිනියගෙන් බලෙන් ලබාගත් සැකකරු බැංකුවෙන් පිටතට පැමිණ දිවගොස් ඇති බවයි වාර්තා වන්නේ.
එහිදී මාර්ගයේ රථවාහන රාජකාරියේ නිරතව සිටි පොලිස් නිලධාරියෙකු මොහු පිළිබඳව සැකසිතී පසුපස ලූහුබැඳ ගොස් අත්අඩංගුවට ගෙන තිබුණා. ඊයේ අධිකරණයට ඉදිරිපත් කිරීමෙන් අනතුරුව මේ වනවිට රැඳවුම් නියෝග මත අදාළ තරුණයාගෙන් වැඩිදුරටත් ප්‍රශ්න කිරීම් සිදුකරන බවයි පානදුර - දකුණ පොලිසියේ ජ්‍යෙෂ්ඨ නිලධාරියෙකු සඳහන් කළේ.
සැකකාර තරුණයා කොල්ලූපිටිය ප්‍රදේශයේ පදිංචිකරුවෙකු වන අතර, රුසියාවේ මොස්කව් විශ්වවිද්‍යාලයේ වෛද්‍ය ශිෂ්‍යයෙකු ලෙස අධ්‍යාපනය හදාරා ඇති බවට පොලිසියට ප්‍රකාශ කර තිබෙනවා. ඉදිරි අධ්‍යාපන කටයුතු සඳහා මුදල් නොමැතිකම හේතුවෙන් නැවත ශ්‍රී ලංකාවට පැමිණි බවයි ඔහු අනාවරණ කර ඇත්තේ.
Post a Comment